شبكة ومنتديات همس الأطلال Network Forum whispered ruins - عرض مشاركة واحدة

#1 02-13-2013

ازيكوا يا فتاتيك عاملين ايه؟ انا جايبة النهاردة طريقة كيكة سهلة جداااا وبسيطة ومناسبة دلوقتي لموسم الشتا عشان البرتقال متوفر وموجود وانا جبتها من منال العالم اللي بصراحة بحب وصفاتها كلها جدااا ودايما بتطلع الحمد لله مضبوطة وحلوة وبتعجب جوزي

ندخل بقى على المقادير ونشوف كده

المقادير:-
2 كوب دقيق
1 ملعقة كبيرة بيكنج باودر وانا شخصيا بحب استخدم كيك شيف اللي ظاهر في الصورة ده لانه كمان فيه محسن كيك فبيضبط الكيك وبيخليه هش وحلو جدا.
رشة ملح بسيطة.
1 كوب سكر ناعم الحبيبات.
5 بيضات.
1 كوب زيت ذرة (والزيت هنا ليه ميزتين حلوين جدا اولا انه بيخلي الكيك خفيف مش تقيل ومش دسم وهش وكمان لو قعد عندك كذا يوم مش بينشف خالص بالعكس بيفضل طري وكأنه طازة)
3\4 كوب عصير برتقال.
رشة فانيليا.
برش برتقال

نشوف بقى الطريقة مع بعض سهلة جداااا ومش بتاخد وقت نهائي
أول حاجة نشغل الفرن على درجةحرارة 180 عشان يسخن.
نجيب الدقيق ونحط عليه البيكنج باودر والملح وننخلهم وبعدين نحط عليهم برش البرتقال.
وبعدين هنحط البيض والسكر والفانيليا مع بعض ونضربهم كويس على سرعة متوسطة لحد ما يبقى الخليط فاتح خالص وخفيف.

نضيف العصير والزيت ونقلبهم تقليبة سريعة وبعدين نبدأ نضيف الدقيق بالتدريج.
هنحط الخليط كله في صينية مدهونة زيت كويس وندخلها الفرن على درجة حرارة 180 لمدة 40 - 45 دقيقة.
وده شكل الكيك قبل ما يدخل الفرن

وهنا بعد ما استوى وخرجت من الفرن بالسلامة

فيه صوص بقى بيتحط على الكيكة دي وهو سهل جدا عبارة عن سكر بودرة وعليهم عصير برتقال وبرش برتقال وممكن تحطينقط من اللون البرتقالي عشان تدي لون حلو وتقلبيهم مع بعض كويس لحد ما يبقوا صوص كثيف بالشكل ده (بس خلي بالكوا الصوص محلي جداااا فانا مش بحطه على الكيكة كلها وحطيته بس في طبق جوزي)

وده بقى كده شكلها النهائي في الطبق هشة وطعمها رااااااائع وخفيفة جدا

ساعد في نشر والارتقاء بنا عبر مشاركة رأيك في الفيس بوك

المصدر: شبكة ومنتديات همس الأطلال شبكة ومنتديات همس الأطلال Network Forum whispered ruins - من قسم: مطبخ همس الأطلال .

;d; hgfvjrhg