رموز شعرية : الشاعر [ بدر عبد المحسن ]

بحر العيون

تقول اللي طرف عينك أنا مدري هدب أو عود
أحس اني من اللي صابها ماشوف قدامي


ضحكت ..وقلت لاتخافي على بحر العيون السود
على شط الكحل مريت ..وهذا موضع أقدامي


أدوّر عن ذهب عمري .. أدور كنزي المفقود
وأشوف الموج يطوي الموج ويبحر مركب أحلامي


عيوني بسمة اعيونك ولو صارت مطر ورعود
أبا اشرب من ظما دمعك وابااغسل جرحي الدامي


عطيني عيونك الليلة ..وباكر ياعساه صدود
أمانه لا مسحتي الكحل خلي طيف أحلامي


أحبك كان يكفي الحب جروحي في هواك شهود
أنا اللي راس مالي حلم .. وهم الدنيا قدامي

[ نجمة ونهر ]

لو حبت النجمة نهر

طاحت على صدره سنا

ان مرت الغيمة قهر

وان هبت النسمة قهر

و لو رمى طفلٍ حجر

عكر مواعيد الهنا

لو حبت النجمة نهر ... لو حبته

انت وانا نجمة ونهر

طالت مشاوير السهر

بينك و بيني الغيم

والشمس و اغصان الشجر

و حكي العواذل و الحذر

و لو رمى طفلٍ حجر

عكرمواعيد الهنا

لو حبت النجمة نهر ... لو حبته

يا بنت للنجمة سما

وانا لي الوادي

ما اختار في قربك انا

ما اختار في بعادي

امشي و لا ودي

لو تمسكي يدي

لا اضيع ف امواج البحر

و يضيع ميعادي

و لو رمى طفلِ حجر

عكر مواعيد الهنا

ولو حبت النجمة نهر ... لو حبته

.


شكراً صدقت

لـو كـان فـي كفي رميته في كفك
"يـفداك مافي الحب من صادق الحب
تـحبنّي؟؛؛ياعلّني بـعض ضـعفك
قـلبي جـرادٍ بـعد مـا حصّل العشب
أنــا قـديم الـهم وأنـفع لـعطفك
"أمـا الـهوى يـاسيدي مركبه صعب
يـا لـيت لي صهوة جوادٍ وأخطفك
لـلشمس لـنجوم الـمجرات للشهب
تـحـبني؛؛وأقول مـن زود لـطفك
شكراً صدقت وألف شكراً على الكذب

اوقات.

أوقات ياخذنا الحكي ..
وننسى بالحكي أوقات ..
واوقات .. يا ليت الكلام سكات ..
يجرحنا الحكي ..
اسهر .. مع حبيبي .. يا قمر الكلام ..
لين يغفى حبيبي .. وجروحي تنام ..
ابعد عن حروفي .. وعن المي وخوفي ..
وابحر في سفينه .. عن بحر الظلام ..
وصلنامدينه .. من عطر وغمام
انا وين القى كلام .. ما مر فــ كلام
اوقات .. يا ليت الكلام سكات ..
يجرحنا الحكي ..
بغني لعيونك .. في حزني وفرحي
وبكتب عيونك .. قصيده لجرحي
واخلي ابتسامك .. دموعك كلامك
قمر هالسوالف في ليل السكوت ..
ولو الف نجمه في عيني تموت ..
في حزني أحبك .. ويأسي أحبك ..

أحبك .. مأقول أوقات

ادفن يدي.. تحت الثرى

ادفن يدي.. تحت الثرى ..
واسقيها من جفني ارق ..
يذبل مابين اصابعي ..
عشب وورق ..
ادفن يدي.. فوق الثرى ..
يلفها برد وسموم ..
واحس بعروقي يبست ..
ما توصل عروقي الثرى ..
ولا تشرب عروقي النجوم
وينبت على جفني سهاد ..
يذبل ورا صدري الشجن ..
اشقق اوراق الزمن..
وانام..
في حلقي الليله جفاف ..
شربت أيامي.. ومضت ..
واللي بقى جرحي الوفي ..
في خاطري باب يرد ..
وسراج دوبه ينطفي ..
اغطي الظلمه بظلام ..
كل ما اشد اصابعي ..
على العيون المتعبه ..
جرحٍ ينام .. وجرحٍ شعر بي وانتبه ..
قام وتبعني لشرفة ظلمه بعيد ..
جاني يقاسمني السهاد.. جاني قصيد..
ادفن يدي تحت الثرى.. فوق الثرى ..
واعيش انا بباقي يدي ..
نصفٍ يموت.. ونصفٍ درى انه يموت ..
يا سيدي.. ربي انا نقطه فـ بحر ..
علمني كيف اهوى الحياه ..
علمني كيف اهوى القدر ..
علمني بإيماني اكون ..
يارب.. اكثر من بشر ..

وهنا نختم إستضافتنا لمُهندس الكلمه ..

الأمير الشاعر
( بدر بن عبدالمحسن)



وشكراً لكل من تواجد هنا أو تابعنا .
وأنتظرونا بإستضافه جديده لشاعر أخر .


وعميق الإمتنان لكم جميعاً .. سُعدت جداً بكم وبحضوركم الأنيق .
تحياتي للجميع