مرت علي اظروف واظروف واظروف

مرت علي اظروف واظروف واظروف

يابنت وجه الخير بيّن ومعروف
لو ماتكلم شافت الناس خيره
والوجه الاقشر ماهو بحاجة اوصوف
يبان حتى للعيون الضريره
من عاش يتبع خطوة المال ملهوف
رزقٍ كتبه الله .. مافيه غيره
الخوف لو ينفع .. نفع صاحب الخوف
اللي على حقه يدينه قصيره
الضعف ماغيّر قدر ناسٍ ضعوف
عاشت صغيره ويوم ماتت صغيره
كلمة احبك بس من اربع حروف
وتحكي احاسيس ومشاعر كثيره
الحب اكبر من سهر ليل وطيوف
ماتفهمه حتى القلوب الكسيره
تدرين اصدق حب يطلع من الجوف
حب الفقير اللي عشق له فقيره
احلامهم تكبر من ملامس كفوف
وتكبر من اشواق العشير لعشيره
كنه معاها لو على ضلع مكشوف
داخل قصر يجمع امير واميره
احساسهم صادق بلا كذب وزيوف
كلن يقول اللي يريّح ضميره
احساس طفله عندها العيد نفنوف
تظن من تلبسه صارت كبيره
وانا لحالي مجابه صفوف وصفوف
واليا خسرت اقول فدوه وخيره
اطيح ووقف وابعد الشوف واطوف
اخذ قليل الزاد وارحل لديره
اترك كثير الزاد واكسب ماعروف
ترك الكثير يجملك في مصيره
يمكن يجيه انسان هالك من صدوف
يلقا من اللي تاركه مايجيره
شايف من الدنيا وعايف بشر عوف
اجناب والا من رجال العشيره
مرت علي اظروف واظروف واظروف
ماريحت حتى العيون السهيره
وللحين راسي راس وكتوفي كتوف
ماغيّرت مني ليالن عسيره
مدام فيني حيل وعيوني تشوف
والله معيّشني بحاله ستيره
والله لستقبل على بابي ضيوف
لو ما املك الا دلتين وحصيره

ساعد في نشر والارتقاء بنا عبر مشاركة رأيك في الفيس بوك

المصدر: شبكة ومنتديات همس الأطلال شبكة ومنتديات همس الأطلال Network Forum whispered ruins - من قسم: أطلال العَرُوض و القافية ، وقناديل من صفحات الشعراء .

---

lvj ugd h/v,t ,h/v,t