1
المها
آخر حركات التدلع والغنى .. اللي اسمها مها وبالدلع مهاو
فرفورة تسلف الشمس السنا.. مغوية يطرد وراها كل غاو
إن وقفت كل شيء متباعد دنى.. وكل شيء متلخبط مع الوقفه تساو
وليا مشت قال النمل الله لنا .. تقاو يا جوعي على صبري تقاو
ذروة ترف ذروة غنج ذروة هنا.. جمال ما يستوعب و ما ينتقاو
في جنبها نورة وعبير ومنى .. شباب وعند البدو كشختهم فراو
مخلوق لا منه انثنا يعني انثنا .. كل الزوايا تستقيم إليا تزاو
يا ابوي شيء لا يوصف ولا ينجنا .. يسبب إلك جروح لا يمكن تداو
مثال: لا جاعت وطال بها العنا .. كل الحلاو اللي على هالأرض جاو
هي جايعة يا رب تاكلني أنا .. هذي سواليف الحلاو مع الحلاو
وليا كلت أطرف حلاوه من هنا .. كل الحلاو يشوفها ويقول وااو
2
حبيبتي
حبيبتي تحفه من النوع الفريد .. لا جيت اب امدحها اخاف اذمها
لان المديح بها ينقص ما يزيد .. ولانها خيال وطايش وما همها
متمرده وبعقل هارون الرشيد .. وفي الزين ما عذرا توقف يمها
لو قستها مثلا على الجيل الجديد .. تحط حليمه بولند في كمها
من غيها السادات سواد العبيد .. تحر وتبرك عند ركبة عمها
ومن غيها لا من تفنت كل حيد .. وده يصير انسان لاجل يلمها
ومن غيها حتى الدهن عود العتيد .. يسيل في يدها عشان يشمها
ومن غيها لا من خذت نفس جديد .. تهاوشت الانفاس على فمها
لبيهها ام الفكر ام القصيد .. لبيهها من ضحكها لا غمها
اللي بقوله الله جعلها الحظ السعيد .. والله يخليها لابوها وامها
3
مرتبة الشرف
تضيق بي الدنيا بكبرها من معابيـس الوجيـه ..
و هاذاك لا منه تبتسـم شفـت للدنيـا طـرف
منه و اليه احببته و هو حبنـي منـه و اليـه ..
من غير لا أنا أعترف ومن غير لا هو يعترف
لبه آتحاكى وكل ابـوي يعـرف غايـة كل ابيـه ..
اليا فرح افرح و دمعـه لا ذرف دمعـي ذرف
اغليه يعني اعشقه ، اعشقه يعنـي امـوت فيـه ..
يعني أنا ميت معا عشقـه و مرتبـة الشـرف
ميت و يعشق و السبب ما فيه داعي ان آحكيه ..
الغيـد فالدنيـا هـواه ، وهـو لحالـه محتـرف
الشامخ اللي لا اقبل و حضن يديني فـي يديـه ..
تراعدت فرايصـه بالغنـج و أتساقـط تـرف
امشي معه من غير لا اين و لا كيـف و ليـه ..
من حيث ما يجرفني آغمض عيوني وانجـرف
ان قال لا أقول لا ان قـال ايـه اوقـول ايـه ..
ما اعرف ما اسمع ما أرى ما أرى ما اسمع ما اعرف
اللي اعرفة انـي أبيـه يتجمـل بـي و أبيـه ..
و كان العدل في صدته سجلني اكبـر منحـرف
يغفر لـي الله و الله يديمـه و يرحـم والديـه ..
علمني ان البعد نكسه حـال و الصـده قـرف
4
وريدي
ياللي غرامك جاريٍ في وريدي .. لا وش غرامك جاريٍ في وريدي
استغفر الله لو بقول ان غرامك .. ما باقي إلا يطبع اسمك على ايدي
لأنك بصدري و أنت منته بصدري .. تطلع مع أنفاسي و ترجع يا سيدي
اليا طلعت أحس كني أشوفك .. و آنقص أنفاسي ذكا .. يا ضديدي
أخاف لا تطلع و لا عاد ترجع .. و اشفق على شوفتك و اقول زيدي
فهل علمت عن جنوني يا آنف .. اني لمجنون النشاز المجيدي
لبيك يا سلكا حملت الفضائل .. أوعز لصاحبك بتحرير قيدي
يعني بحكينا لبى و الله عروقك .. متى تعيد في عيوني يا عيدي
ثقفني بوصلك مثل ما تثقف .. شعار جيلي من ثقافة قصيدي
لو ضلع عيني حس موطى وصالك .. لا طاح حيده و لا طاح حيدي
تخيل اني من كثر ما اتخيل .. اتخيلك تدعي و احسب انك ميدي
يا خي ترى جننتني بالمفارق .. جننتني و انا بعدني يا جيدي
لكن مع الله كل بلوى بخيره .. أنا ذكاي من التجارب رصيدي
اذكرني اليا من سمعت بغرابه .. اليا سرى فعروق مخك جديدي
و أنا بعد لا من ذكرتك يا غالي .. باسجد لوجه الله و باقبل ايدي