شبكة ومنتديات همس الأطلال Network Forum whispered ruins - يادمع وش بك على شرفة عيوني تويق

يادمع وش بك على شرفة عيوني تويق
اما انحدر في ستر ولا استتر وبركه

انا ضحية طموح وطول صبر وطريق
مضيع في متايهه وكثر سككه

لو كنت احمل متوني فوق مالا اطيق
ماني بمن تركة اللي وحد المملكه

انا ضعيف وقلبي مستذير ورقيق
تصيدني بشكبه ولابدون شبكه

يتيم مالي من الدنيا صديق وشقيق
حطيت خشمي بخشم الوقت لين فركه

ياسيدي شد حبلك لايموت الغريق
وانا كان ماودك تشده لاتتركه

صدرك ولو ضاق لايعطي مسج بالشهيق
انا كان له ممسكٍ بالحلق فأنت امسكه

انت ولد فهد مانت بمثل قوم تضيق
اللي توسع خواطرهم طق تنكه

وانا كان في قلبك الخفاق جرح عميق
اما دعاك خافقك وازعلك فانت ادعكه

وش حده يعاند القمه ويرقى طويق
وش حده يورد ضعونه على التهلكه

يامثقل الطيب باب المدح دونك غليق
كل الجمل فيك مقيوله ومستهلكه

مشكلتك انك لبحر الجود صرت المضيق
واخذت دره ولولوه وعفت سمكه

لو تمنع حكاك ماهد النحل بالرحيق
لو تطلق حكاك ماصار السكوت بركه

مؤمن ولك قلب متوكل ووجه طليق
ولاتأثرت بالاعلام والفبركه

ولعت في كبد من عادك حر وحريق
دقيت باشاك بالتسعه واكلت اككه

افعالك اقوال مثبوته وعهدك وثيق
وغيرك ماشفنا سوى هرجه وكثر كلكه

صادق نباك وكرمك وفزعتك للعويق
تعطي امل للذي فك الزمان علكه