|
رموز شعرية : الشاعر [ بدر عبد المحسن ]
|
رد: رموز شعرية : الشاعر [ بدر عبد المحسن ] http://img8.7ozn.com/files57/2012-09...3481374251.png ابعتذر عن كل شئ .. إلا الهوى ماللهوى عندى عذر.. ابعتذر عن أي شي .. إلا الجراح ماللجراح إلاالصبر .. إن ضايقك انى على بابك أمر .. في ليلة ألم.. واني على دربك مشيت عمري وأنا قلبي القدم .. ابعتذر ..ابعتذر ...كلي ندم ... عن كل شئ إلا الهوى .. ماللهوى عندي عذر ... اتصدقي ماخترت أنا أحبك .. ما احد يحب اللي يبي ياحبي المر..العذب سكنتي جروحي غصب .. ليت الهوى وانتى ...كذب كان اعتذرلك عن هواى .. وماأقول أنا كوني معاي .. وان ضايقك انى على بابك امر.. في ليله ألم ... وانى على دربك مشيت عمري وأنا .. قلبي القدم ... ابعتذر ..ابعتذر .. كلي ندم .. عن كل شئ .. إلا الهوى .. ماللهوى عندي عذر .. الله كريم حبك يكون همي القديم وجرحي القديم ... والله عليم يا أحلي العيون .. ان الفراق .. جزا الفراق .. ابوعدك .. كان الطريق بيبعدك .. بامشي بطريق .. وكان الحجود بيسعدك ... مالي رفيق .. ابجمع اوراق السنين ..وأودعك.. كان الفراق اللي تبين .. . الله معك |
رد: رموز شعرية : الشاعر [ بدر عبد المحسن ] :) الكلمات جميلة .. التصميم أجمل .. |
رد: رموز شعرية : الشاعر [ بدر عبد المحسن ] شكرا محب .. بإنتظارك |
رد: رموز شعرية : الشاعر [ بدر عبد المحسن ]
|
رد: رموز شعرية : الشاعر [ بدر عبد المحسن ] http://img8.7ozn.com/files57/2012-09...3481494601.png الماء ركـد والجـريد الغـض ماهـزّه.. نـسـايـم والـزمـن لا جـاء ولا راحـي.. جـمحـت يامهـر حظي واثر بك فـزّه.. ما طـولـت كـلـهــا غـاره ومـشــواحـي.. لـو كـنت رمح بـكـفـي كان بـهـزّه.. لا شـك من هـو عـليه اهـوش بسـلاحـي.. ولـو كـنت بيـرق عـقـيد وين ابارزّه.. واطـول طـويل اشـوفه هـضبة جـراحـي.. يا سـيد الناس شـمـسك مالهـا حـزّه.. تعـبت أمـاري بشـمعـي وضي مصـباحي.. من مـس نـورك جـبينه يبـشـر بعـزّه.. ومن مـر غـيمـك عـتيـمه بـارقـه لاحـي.. يا ســيـد النـاس .. كـل لابــس بـزّه.. صعـب نـفـرق ما بين الخـبـل والصاحـي.. كـم واحـد مـرّ وقال عـيـوني تخـزّه.. هـو مادرى اني عـمى عن قاصر اشباحي.. انـا عـيــونـي .. تتـل النجـم وتـكـزّه.. عـن حـارك الفــلـك هـذه عــادة رمـاحـي.. وماالـوم حظي تعـب من كثر ما أدزّه.. لـو هـو لغـيـري نـســاه الهـم وارتـاحـي.. ميلاد فجر وسعيد بمشاركتك وسأنتظرك أكيد فقط أذكرك بكتابة أسم القصيده المطروحه حتى لايتكرر طرحها ودمتِ |
رد: رموز شعرية : الشاعر [ بدر عبد المحسن ] بارك الله فيك وفي موضوعك الجميل |
رد: رموز شعرية : الشاعر [ بدر عبد المحسن ] مشكور حلو الموضوع عجبني |
رد: رموز شعرية : الشاعر [ بدر عبد المحسن ] في عيني تغيب الشمس وتشرق بعيني في ناظري للشمس موتٍ وميلاد لليل في دمعتي سنا نجمتيني وللصبح في جفني شفق هم وسهاد كن السهر دربِ عليه بتجيني ولا ودي اقطع درب لاماك برقاد ياللي جميع الناس بينك وبيني كل لحظة أبنتظر منك ميعاد عذري ليأسي منك أنك تبيني خنت الرجاء وأن صنت لي عهد ووداد ولبسمتك ترخص غوالي سنيني جرحي يهون وجاير الشوق يزداد لمصافحك ربي خلق لي يميني أمدها لك وصل وأمدها ابعاد أنسى عذاب العمر وما نسى حنيني تبلى ليالي العمر وجروحك جداد ما يكبرني ذائقة تستحق التفرد ودي . |
رد: رموز شعرية : الشاعر [ بدر عبد المحسن ] طفلة و طفل غديت انا وانتي طفلة وطفل .. تبكين ف وداعي وانا كني مفارق أهل .. وبيت صغير ودرب كهل .. ياللي على خدك كحل لوتمسحيه وتتبسمي مال البكا داعي ياللي سنا عيونك أمل لا تقتليه تتألمي مال البكا داعي يا اول مواعيدي ويااخر مواعيدي انتي فرح عمري وجرحي وتسهيدي .. افارقك ليله يا طولها ليله .. واجيك انا باكر وقلبي على إيدي .. ومادري سبب خوفك وانتي العمر شوفك .. ياللي على خدك كحل لوتمسحيه وتتبسمي مال البكا داعي ياللي سنا عيونك أمل لا تقتليه تتألمي مال البكا داعي وغديت انا وانتي طفلة وطفل .. تبكين في وداعي الشراحيلي ~ سهارى ~ سُلمٌتم وشكُرآ لْ حضًوركٌم .. طبتٌم بخٌيرْ لكم :40: |
رد: رموز شعرية : الشاعر [ بدر عبد المحسن ] : ( المرايا ) كلنا عشاق لكن .. إنتي لا ما انتي معايا .. لما تجمعنا الأماكن تاخذك مني المرايا .. انتي مشغوله بروحك ما ملك عقلك وروحك لا أنا.. ولا سوايا اعطي ظهرك للمرايا .. وشوفي غيرك اظهري من ليل كحلك ومن أساورك وحريرك افتحي الشباك مره .. شوفي الناس والشوارع وش كثر هالغربه مره .. للي وسط الزحمه ضايع انتي مشغوله بروحك .. ما ملك عقلك وروحك لا أنا.. ولا سوايا كلنا عشاق لكن كل واحد له حكايه . . كلناعشاق لكن كلنا نحبك.. نحبك وأنتي جرحك في ساكن .. وأنا جرحي برا قلبك أمشي لو نصف المسافة .. وقفي بينك وبيني أكسري كل المرايا .. أنتي أجمل وسط عيني يا للي مشغولة بروحك من خذا قلبك وروحك هو أنا .. ولا سوايا كلنا عشاق لكن كل واحد له حكاية |
رد: رموز شعرية : الشاعر [ بدر عبد المحسن ]
|
رد: رموز شعرية : الشاعر [ بدر عبد المحسن ] شرايد نوم على الوساده شرايد نوم .............من ما ترك خلي الجافي لعل تالي سهرك اليوم .............يا عين و اللي مضى كافي هجرت هم و طويت سقوم .............و دخلت في المخدع الدافي و ساعة غفى جفني المحروم .............و رميت حملي على اكتافي حلمت باللي هواه حلوم .............يصب جمرٍ على اطرافي و انا احترق يالله المقسوم .............و اطفي النار بلحافي يا زين للعاشقين سلوم .............و غاديك تحكم بالانصافي هو ينعدل لا شقى مظلوم .............او يشكي السقم متعافي ما شفت جرحٍ عليه هدوم؟ .............هذا انا البيٌن الخافي |
رد: رموز شعرية : الشاعر [ بدر عبد المحسن ] http://img8.7ozn.com/files57/2012-09...3483102591.png ( مجنونها ) أنا لعيونها بس.. لعيونها.. قلبي سراب بدونها .. وعيني سراب.. ما اقول أعشقها بعقل.. مجنونها .. مجنونها البارحة مريت في أحلى الفصول.. صيف وشتاء.. وناظرتها.. وقلبي يقول .. هذي العيون إلى متى.. حبيبتي ياكثرها عيونك على هالليل.. وين ما التفت اشوفها .. حبيبتي يازينها عيونك ورى هالليل.. سحرني برق سيوفها.. ما أقول أعشقها بعقل.. مجنونها .. مجنونها .. قمري يا شمس الذهب .. سفري فعيونك تعب .. قلبي تعب وصبري تعب.. ومن الهدب لين الهدب.. بحر ومراكب من لهب.. أمواج تبحر بي رضا .. وامواج تلعب بي غضب .. وانا لعيونها بس .. لعيونها .. قلبي سراب بدونها .. وعيني سراب .. ما اقول أعشقها بعقل.. مجنونها .. مجنونها .. |
رد: رموز شعرية : الشاعر [ بدر عبد المحسن ] http://www.al-jazirah.com.sa/culture/08032004/20.jpg { ياقلبك الخواف} اغنية للفنان محمد عبده ..سمعتها ثم سمعتها ثم سمعتها ولازلت مستمرة في سماعها لدرجة اني حاولت ان اعرف سرها وماتخفيه هذه القصيده كانت للمبدع الشاعر الكبير (البدر ) وجدت لها قصة جميله جدا وهذه القصة .. يقول احدهم : كنت كل ما اشوف هالانسان اقوله بيني وبينه وشلون قلبك (( الخـواف )) ...! كان دايم يرد علي: نحن السابقون وانتم اللاحقـون...! اليـوم ذكرته بالسالفه ...! قال: تصدق على ان لها 22 سنة الا اني مستحيل انساها واذكر تفاصيلها ...! سنة 1985 كنت ايامها ادرس في امريكا ولي سنتين ما طلعت من امريكا وقررت وقتها اروح اشوف الاهل في جينيف...! ما كنت اتصور ولا اتخيل اني باشوفها هناك لان كل اخبارها بعد زواجها انقطعت عني وانا انشغلت بدراستي ...! يومها رحت لجينيف وانا مشتاق اشوف الاهل هناك...! لكن من ثالث يوم وصلت الا وتلمح عيوني زولها اللي ما غاب عني طول ايام غربتي...! وقفت في مكاني وتمنيت ان الزمن يشاركني الوقوف...!! حاولت ابتسم حاولت اقرب منها واسلم عليها لكني خفت ...!! لقيتها تبتسم لي...! تشجعت اقرب منها بس تذكرت انها صارت مثل السراب لي وانا العطشان...!! وقتها ما عرفت وش اسوي اكلمها بس اخاف ان زوجها موجود معها لقيت اختها تجيها ويمشون وتلتفت لي بنظرة فيها وله وشوق...! ... بعدها بيومين وانا راجع الى الاوتيل لقيت رسالة من الرسبشين وكانت منها تقول انتظرني الساعه 2 صباحا راح اكلمك...!!! وقتها فرحت وبنفس الوقت خفت اكثر ما ادري وش بقول ولا وش صار لها ولا وش تبي تقول...!! مرت علي الساعات كنها سنين وانا انتظر رنة اتصالها...! اول ما سمعت صوتها قلت لها وحشتيني...! ردت علي وقالت تدري انك ما غبت عني لحظة وحده...! تكلمنا كثير وبكينا وضحكنا وقالت لي انها شبه منفصله عن زوجها وانها تعبت كثير معه حيث انها لا تشعر له بأي مشاعر وغصبا عنها تصبر وترضى بقدرها كيف وهي صارت ام الان...!! اهم شيء وقتها طلبت مني انها تشوفني...! حاولت اتعذر وابرر لها ان هذا الشيء ماينفع خلاص ولا راح يفيدنا بالعكس راح يتعبنا اكثر...! لقيتها تقول (( عطني من ايامك نهار وباقي العمر للي تبي ))...! خلاص قلت لها اشوفك بعد بكره...! ويوم قفلت السماعه منها وانا اتذكر اول مره سمعت صوتها واتذكر احلى ايام عمري و اول شبابي...! واذكر ايام انكساري معها وحرماني منها ...! واذكر رحلتي لامريكا وذهابي الى ابعد مكان عنها عشان انسى اللي صار واتحسب على اللي ابعدني عنها وعن الظروف اللي حرمتنا من بعض...!!! ويوم قرب الموعــد لقيت قلبي (( الخواف )) يقلب علي المواجع ويقول لي البعد احسن لك من انك تعيش فرحة مزيفه وتاخذ مكان غيرك وترجع منكسر ثاني...!! وقتها وقفت بي خطاي عنها وما رحت ...! وفي الليل كلمتني تعاتبني قلت لها ما قدرت خفت وكرهت اشوفك واجلس معك وانتي خلاص صرتي لاحد غيري...!! ... بعدها بكم يوم شفت بدر بن عبدالمحسن وكان تربطني به صداقه على انه اكبر مني ...! قلت له وقتها القصة كلها والاحداث وش قلت وش قالت لي...! لقيته يقول لي يا قلبك (( الخواف ))...! بعدها بيومين تعشيت مع البـدر سوا ورحنا نحضر حفلة محمد عبده وغنى يومها لاول مرة اغنيته الشهيرة (( المعازيم ))...! كنت اسمع محمد عبدة يقول (( محبوبتي معزومة من ضمن المعازيم )) كنت اتلفت في الحفلة يمكن تكون موجودة...!!! وبعد الحفل لقيت البدر يتكلم عن الاغنية انها رائعه و وافقته الرأي...! قال لي انت يا (( الخواف )) كتبت قصيدة عنك...! لقيت البـدر يعطيني ورقه من اوراق البوريفاج مكتوب في اولها...!!! (( لا تسرق الوقت من غيري .... انا مابي زمن غيري ))...!! لقيت نفسي وعمري واحلي ايامي في قصيدة...! وتمـر سنة وتجي سنة 1986 وتصير اغنية بصوت محمدعبده وكانوا الناس وقتها في حفلة الكرنفال يرددون معه (( يا قلبك الخواف ))...! حسيت كلهم يعاتبوني... يقول البدر لا تسرق الوقت من غيري...! انا ما ابي زمن غيري...! لا تسرق العمر يا طيري...!! مدام قلبك لاحد غيري...!! عطني من ايامك نهار ... وباقي العمر للي تبي..! مابه فرح يا معذبي ... وانت لاحد غيري...!! ناظر وعدنا طاف ... في اللي درا ومن شاف...!! يا قلبك الخواف .......... يا قلبك الخواف...!!! يا صاحب الخوف ... ما يطمن الخوف...!! لا تلمس الجوف لا لا ...! لا تلمس الجوف ...! وانت ايدينك بارده ...! والفرقا دايم وارده...! إنت وانا بنفس الطريق بس الخُطا متباعده...! لا تسرق الوقت .... يا اجمل الوقت...! تكذب علي واكذب عليك .... وألقى الدفا برعشة ايديك...! نقضي العمر .. كل العمر ...! نحلم بلحظة شاردة...!!! |
رد: رموز شعرية : الشاعر [ بدر عبد المحسن ] نامت عيونك وصحى الليل مظنونك أغاني قصّت جناح الثواني غيبتك وصارت الساعة أماني أنا حروفي في غيابك لا هي حكي ولا هي قصيد أكتب الظلمة وأعيد وإنت يالفجر البعيد نامت عيونك إسهر معي ليلة حاول تحس بلوعتي ليلة عد النجوم شكثرها ياللي بقلبي كثرها ونام .. القمر بوسادتك نام ليتك تغير عادتك خل القمر ليلة .. يسهر معي ليلة أنا حروفي في غيابك لا هي حكي ولا هي قصيد أكتب الظلمة وأعيد وأنت يالفجر البعيد .. نامت عيونك |
رد: رموز شعرية : الشاعر [ بدر عبد المحسن ] (( أستبد )) استبد.. استبد احيان استمد كل هذا الظلم من ألمي اتحد من راسي .. لقدمي واضرب بعواصفي وبزلزالي واهّدم الناس .. واهدّم بحالي لين استرد بعض اثيابي من الريح ولحمي من الشوك.. وابتعد..ابتعد واحيان ما املك العواصف .. ولا الزلزال ولا حتى .. فـ الهجير . . ظلال لكن استبد.. استبد باللي عندي اضرب بيدي فـ الهوى..بجبيني فـ الصخر لين اتعب ..اتعب..وانهمد مثل طفل اضناه البكا.. والسهر وانتي آخر ماأعد في عمري واجمل ما أعد اعشقي ظلم الغصون الخضر للحطاب والجلد للأنياب..والجفن للسكين اعشقي هـالظالم المسكين... واتركيني انصهر في الشمس والا ارتعد في البرد لكن استبد.. واسترد اثيابي من الريح ولحمي من الشوك وابتعد .. ابتعد |
رد: رموز شعرية : الشاعر [ بدر عبد المحسن ] http://i.imgur.com/S6X9g.jpg ( عالي السكوت ما اسمعك ) من رجعك كنت السفر , من رجعك ..! ضاع الطريق او ضيعك لا تقول احبك لا تقول عالي السكوت ما اسمعك .. تذكر في يوم الفراق لما وقفت اودعك ناديت يا عمري ابيك و بكيتها عيوني عليك و تركتني الله معك لا تقول احبك لا تقول عالي السكوت , ما اسمعك .. يا صوتك الناحل ٍ في ضجت ظنوني انت الزهر ذابل في قلبي و عيوني .. صدقني ما يفيد العتاب و صدقني ما يكفي الندم . تبغاني احبك للعذاب والا احبك للالم .. انا حتى مدري وش تقول عالي السكوت , ما اسمعك .. عالي السكوت , ما اسمعك .. عالي السكوت , ما اسمعك .. |
رد: رموز شعرية : الشاعر [ بدر عبد المحسن ] بس أحلم صحيح اني انسى الحوادث والملامح و الاسامي.. لما أكتب عن غرامي .. شعر ابعد ما يكون عن مجرد جرح دامي .. يمكن أقرب للجنـــــــــون ... من تفاصيل الحكاية.. الاساور والمرايه.. عندي همــــــوم القصيده غامضه صعبه عنيده.. وانت عاشق للوضــــوح .. ودك بسري ابوح.. و انا اخر همي بــوحي اعبر الشارع ... في الرصيف الثاني قهوه فيها اربع طاولات .. وحده اجلس فيها وحدي .. وحده للي بيجي بعدي .. وحده لأغلى حرف عندي.. أما اخر وحده دايم للي فات.. من هموم وذكريات .. زحمة لكن كل من في القهوه ربعي كلهم دمي و دمعي ليه ما تجلس مكاني وهذا شوفي وهذا سمعي اطلب اقلام ودفاتر .. وحاول اكتب عن شعور .. لاهو ظلما و لا هو نور .. قلب مابين السطور .. وانا اكتب اغنيه مثل الرسايل كنت اكذب .. و الخيال العذب.. كذب .. كنت لازم اخفي سري و ما اقول ان هالمره قصيدي هو خيالات الحقــول تطرد اسراب الطيور عن حقيقه عن شعور .... ما هو في ذهب السنابل .. انما تحت الجذور .. كســـــروا العشـــاق بابي ... قطعوا لحمي ثيابي.. وخلعوا الادراج .. طاحت مزهرياتي الجميله شققوا جفني كتابي وسألوا وين الجديله ودمعة العين الكحيله مالقوا في بيتي الا .. وما لقوا في صدري الا .. وما لقوا في قلبي الا .. امنياتي المستحيله .. و اني احـــلم بـــس احلــــم .. |
رد: رموز شعرية : الشاعر [ بدر عبد المحسن ] ( تخيــل ) تاقف على اطراف الهدب .. وماشافتك عيني صافحتني ومدري ... يدك هي لمست ايديني سلم .. ابرد السلام .. وهذا ترى كل الكلام .. اللي بقى بينك وبيني ... تخيـّــل ... من وين ... ومنين ومتى ... بالله ذكرني ... بالله ذكرني ... متى جيتك انا فـ ليلة شتا .. تهزني ريح الشمال ... محتاج انا لبسمه وشال ... تركتني لبرد الطريق وانا على بابك .. اتذكر انك قلت لي بالله وش جابك .. ودعتني قبل السلام .. وهذا ترى كل الكلام اللي حصل بينك وبيني ... تخيّــــل ... اليوم لعيوني السما والارض البعيد ... اليوم ولغيرك انا يطري على بالي القصيد ... اشتقت للقلب الخلي .. وش هم .. لو تعتب علىّ .. جيتك انا فـ ليلة ألم . . قلبي على كفي ... همست لي روح ياغريب الشوق مايكفي ... سلم ابارد السلام ... وهذا ترى كل الكلام ... اللي بقى بينك وبيني ... تخيّــــل |
رد: رموز شعرية : الشاعر [ بدر عبد المحسن ] ليت الشوارع تجمع أثنين صدفه..! يطيح جفن الليـل واهـز كتفـه نجم يفز، وباقي الليـل مطفـي واحاكي الجدران عن مثل غرفـه ماتشبه الجدارن ويطول وصفـي وتملني الجدارن واظهر لشرفـه تحت السماء واسكر الباب خلفـي ريحٍ تهب وتسكن العظـم رجفـه وتموت ريح وتسكن اوراق نزفي على الروابي تهطل دموع وطفه ويصب لمع بروقها وسط طرفي ياطاري الغدران ، والعمر رشفه مع قلّها ، ياليتها ييـوم تصفـي ليت الشوارع تجمع اثنين صدفـه لا صار شباك المواعيد مجفـي الحب واجد مير الأقـدار صلفـه والارض واجد لكن العزم منفـي والي اعرفه راح مانيب اعرفـه ولااظن يذكرني اليا اقلبت مقفـي ماهو حبيبي مورد القلـب حتفـه ولاهو حبيبي يفرح بوقت ضعفي مُّر ثمر هالليل ، وامـر قطفـه يالحمظل الي صرت اذوقه بكفي هذا وتّو الليـل مـاراح نصفـه ياليل بعض اللي مضى منك يكفي |
رد: رموز شعرية : الشاعر [ بدر عبد المحسن ] * العمر أحبك - الشاعر بدر بن عبدالمحسن لليل أحبك .. مابقى في السما نور والى ضواني الليل .. للصبح أحبك واللحظة اللي كلها صد وغرور اشوف قبري بين عينك وقلبك في صدري اسراجٍ حزين ومكسور رغم المطر والريح ... شلته افدربك والله مابه غير لوعاتي قصور وخوفي عليك الله ربي ..وربك إلى متى ببني على صمتك جسور لاحيرتني اسباب سلمك وحربك العمر احبك... مابقي فينى شعور ومتى جفاني العمر ... وشلون أحبك الله يعطيك العآفيه أخوي |
رد: رموز شعرية : الشاعر [ بدر عبد المحسن ] ( يطيح جفن الليل ) يطيح جفن الليل واهز كتفه نجم يشع وباقي الليل مطفي واحاكي الجدران عن وصف غرفه ماتشبه الجدران ويطول وصفي وتملني الجدران واظهر لشرفه تحت السما واسكر الباب خلفي ريح تهب وتسكن العظم رجفه وتموت ريح وتسكن اوراق نزفي على الروابي تهطل دموع وطفه وتصب لمع بروقها وسط طرفي ياطاري الغدران والعمر رشفه مع قلها ياليتها يوم تصفي الحب واجد مير الاقدار صلفه والأرض واجد لكن الحلم منفى واللي اعرفه راح ماعاد اعرفه ولاظن يذكرني الى أقبلت مقفي ماهو حبيبي مورد القلب حتفه ولا هو حبيبي يفرح بوقت ضعفي مر ثمر هالليل وأمر قطفه يالحنظل اللي قمت اذوقه بكفي متى الشوارع تجمع اثنين صدفه لا صار شباك المواعيد مجفي يابنت تو الليل ماراح نصفه وياليل بعض اللي مضى منك يكفي |
رد: رموز شعرية : الشاعر [ بدر عبد المحسن ] ( قالت يحبني ! سألتها بيتزۈجک ؟ ) قالت يحبني ! سألتها بيتزوجك..؟ قالت مدري ..... قلت اسمعيني ۈخذيها کلمه من رجل يفهم للرجال ترا اللي مايتزۈجک مستحيل انه يحبک اللي مايهديک اسمه ۈيتشرف بک تکۈنين حنانه ۈياخذک عهد ۈأمانه ۈيمنحک بيت ۈحياة ۈيقسم ايامه لقلبک مستحيل انه يحبک ..!!! أي حب اللي تبينه ! أي رجل تصدقينه ! اي عمر تضيـــــــــعينه ! ۈأي زهر تذبليـــــــــــــــنه ! يا حنـــــــــــــنۈنه .. يا رقــــــــــيقة .. يا ۈفــــــــــــــية .. ع البساطة أحسبيها .. ۈإفهـــميها .. ۈإعقلــــــــــــيها اللي مايتزۈجک مستحيل انه يحبک يکفي العمر اللي ضاع ۈيکفي الشمع اللي ماع متى تخلص هلحکاية مره اتخذي قرار ينقذک من هالضياع فارقــــــــــــــــــيه ۈ عــــــــــيشي عـــــــــــــمرک فارقــــــــــــــــــــــيه ۈشۈفي زهرک فـــــــــارقـــيه ۈأمشي دربک تۈبي عن ذلک ۈذنبک ۈإن ضــعــفتي مره ۈرد الحنان حطي في بالک حقيقه قاسية حيل ۈمريرة اللي مايتزۈجک مستحيل انه يحبک |
رد: رموز شعرية : الشاعر [ بدر عبد المحسن ] ( الضي النحيل ) دايم يذكرني النخيل غير الطفولة والرياض .. وصوت السواقي والهديل مواجع الضي النحيل .. على وجنتك .. كان الظلام والله كثير .. وما ادري وش اللي وهقه .. واختار خدك في الأخير وشعاع خدك شققه دايم يذكرني النخيل غير الطفولة والرياض .. وصوت السواقي والهديل مواجع الضي النحيل .. على وجنتك .. نجدية الضي والعتم ما بين راسك والقدم .. لي مجد لي مي ورطب وسنابل الياس والغضب .. ولي مواعيد النخيل اللي مضت .. وحكاية الضي النحيل مع وجنتك .. |
رد: رموز شعرية : الشاعر [ بدر عبد المحسن ] ســــــــــــــــــــــاره من كتب الحب العتاق وتاريخ القراق وستاير الدمع الرقاق .. جمعت قلبي غبار وقطع فخار .. ومن على المرمر البارد .. ومن ما نسته النار من غيمي المحروق .. وحملت عيوني وركبت أول سفينه تبحر .. على وجهي الاصفر خريف طال .. وسلال من رذاذ وملح .. وفي صدري حجارة نسيوها بحاره .. مروا علي ف يوم .. وقالوا تعال معنا وما كان يجمعنا .. إلا الضياع والريح .. راجع من الايام من الاحلام .. ومن الف سناره مغروسة بقلبي لقيت لي بشارة ما اغلى عطا ربي .. أثر العمر ساره وموج البحر ساره .. وكل المدى ساره .. سافرت كل العمر وراجع احب ساره .. |
رد: رموز شعرية : الشاعر [ بدر عبد المحسن ] ياهو تعب اللي يسمونه حنين ! خذني لبلد مافي شوارعها مطر دام المطر كله حنين خذني لأماكن مزعجة للعابرين ! ما أبغى سكون .. أخاف لحظه .. أختلي مع ذاكره مليانه وجيه وتعب .. ! و أحنّ له .. و أنا صديق للظلام والمطر ..! وعشان أحافظ ع الصبر ، بصلي فرضي وأنام .. أبكره الليل الطويل .. و أبعشق ( أزعاج النهار المزدحم ). بس المهم ما أختلي مع ذاكره مليانه بـوجيه وتعب ..! و أكتب شعر ، إذا قريته بعد يوم أستنكره !!! و أستغرب إني قد كتبته ( من كثر ما هو حزين ) ياهو تعب اللي يسمونه حنين ! |
رد: رموز شعرية : الشاعر [ بدر عبد المحسن ] ((الخل العنيد )) تل قلبي .. تل طيرٍ على طلعٍ وكيد جود المقرود سبقه وعيا يطلقه يوم فاع اركى جناحه على قاسي الحديد وانكسر ريش النداوي ولا الله وفقه يكفخ القلب المشقي على الخل العنيد ما وفا بالعهد لا شك قلبي صدقه واهني اللي على الحول ينبت له جديد وش سواة اللي جناحين قلبه محرقه يا لطيف الروح وبحق خلاق العبيد اكرم المملوك بالوصل والا فاعتقه |
رد: رموز شعرية : الشاعر [ بدر عبد المحسن ] http://i46.tinypic.com/5kksvn.jpg ( قصه الحب ) فـ كل قصة حب أحلام ومدينة .. ليل ونخيل وهبوب .. لكل قصة حب لو كانت حزينه .. أجمل ألوان الغروب .. ناظري ضيّ الحوانيت القديمه .. ونقش أبواب البيوت .. كلها شعر ومواعيدٍ قديمه .. وصوت قلبـي اللي يموت .. وما يموت .. ,’ لكل قصة حب .. عذال وحسود .. ليه تخدعنا الأماني .. والليالي السود .. سود إشعلي جمر العناد .. قربـي معاد أشوفك .. لا يفرقنا السواد .. ارسمي وجهي بكفوفك .. ولا تجرّحنا عيون الليل .. وحروف النميمه ولا يعذبنا السكوت .. إن عطشنا أو شربنا الدمع ديمه .. للهوى بنحيا ونموت .. لكل قصة حب أشواك وورود .. وليه نصرخ من ألمها .. وكلها تنبت في عود .. ناظري هذا قمرنا لو تغطيه الغيوم .. وناظري هذا شجرنا مهما تحرقه السموم .. ولو تجرّحنا عيون الليل وحروف النميمه .. ولو يعذّبنا السكوت .. إن عطشنا أو شربنا الدمع ديما .. للهوى بنحيا ونموت .. |
رد: رموز شعرية : الشاعر [ بدر عبد المحسن ] مابقالي قلب كلمات بدر بن عبد المحسن ما بقالي قلب يشفع لك خطيّـه ذوبته اجروح صدّك والخطايـا صاحبي بالله ... لا تعتب عليّه العَتب ما عاد تاسَعـه الحنايـا كلّ جرحٍٍ فات لي منـك هديّـه وش بلاك اتخاف من ردّ الهدايا الله أكبر ... كيف مالك مقدريّه وكل ما تحمله من همّي بقايـا لا تمنّيني ... سَرَاب المهمهيّـه القرَاح اليوم ... ما يروي ظمايا وان غَدى للحب في قلبك شظيه وش يقول اللي غدى قلبه شظايا ● ● |
رد: رموز شعرية : الشاعر [ بدر عبد المحسن ] بحر العيون تقول اللي طرف عينك أنا مدري هدب أو عود أحس اني من اللي صابها ماشوف قدامي ضحكت ..وقلت لاتخافي على بحر العيون السود على شط الكحل مريت ..وهذا موضع أقدامي أدوّر عن ذهب عمري .. أدور كنزي المفقود وأشوف الموج يطوي الموج ويبحر مركب أحلامي عيوني بسمة اعيونك ولو صارت مطر ورعود أبا اشرب من ظما دمعك وابااغسل جرحي الدامي عطيني عيونك الليلة ..وباكر ياعساه صدود أمانه لا مسحتي الكحل خلي طيف أحلامي أحبك كان يكفي الحب جروحي في هواك شهود أنا اللي راس مالي حلم .. وهم الدنيا قدامي |
رد: رموز شعرية : الشاعر [ بدر عبد المحسن ] [ نجمة ونهر ] لو حبت النجمة نهر طاحت على صدره سنا ان مرت الغيمة قهر وان هبت النسمة قهر و لو رمى طفلٍ حجر عكر مواعيد الهنا لو حبت النجمة نهر ... لو حبته انت وانا نجمة ونهر طالت مشاوير السهر بينك و بيني الغيم والشمس و اغصان الشجر و حكي العواذل و الحذر و لو رمى طفلٍ حجر عكرمواعيد الهنا لو حبت النجمة نهر ... لو حبته يا بنت للنجمة سما وانا لي الوادي ما اختار في قربك انا ما اختار في بعادي امشي و لا ودي لو تمسكي يدي لا اضيع ف امواج البحر و يضيع ميعادي و لو رمى طفلِ حجر عكر مواعيد الهنا ولو حبت النجمة نهر ... لو حبته |
رد: رموز شعرية : الشاعر [ بدر عبد المحسن ] .http://img8.7ozn.com/files57/2012-09...3487614901.png شكراً صدقت لـو كـان فـي كفي رميته في كفك "يـفداك مافي الحب من صادق الحب تـحبنّي؟؛؛ياعلّني بـعض ضـعفك قـلبي جـرادٍ بـعد مـا حصّل العشب أنــا قـديم الـهم وأنـفع لـعطفك "أمـا الـهوى يـاسيدي مركبه صعب يـا لـيت لي صهوة جوادٍ وأخطفك لـلشمس لـنجوم الـمجرات للشهب تـحـبني؛؛وأقول مـن زود لـطفك شكراً صدقت وألف شكراً على الكذب |
رد: رموز شعرية : الشاعر [ بدر عبد المحسن ] اوقات. أوقات ياخذنا الحكي .. وننسى بالحكي أوقات .. واوقات .. يا ليت الكلام سكات .. يجرحنا الحكي .. اسهر .. مع حبيبي .. يا قمر الكلام .. لين يغفى حبيبي .. وجروحي تنام .. ابعد عن حروفي .. وعن المي وخوفي .. وابحر في سفينه .. عن بحر الظلام .. وصلنامدينه .. من عطر وغمام انا وين القى كلام .. ما مر فــ كلام اوقات .. يا ليت الكلام سكات .. يجرحنا الحكي .. بغني لعيونك .. في حزني وفرحي وبكتب عيونك .. قصيده لجرحي واخلي ابتسامك .. دموعك كلامك قمر هالسوالف في ليل السكوت .. ولو الف نجمه في عيني تموت .. في حزني أحبك .. ويأسي أحبك .. أحبك .. مأقول أوقات |
رد: رموز شعرية : الشاعر [ بدر عبد المحسن ]
|
رد: رموز شعرية : الشاعر [ بدر عبد المحسن ] وهنا نختم إستضافتنا لمُهندس الكلمه .. الأمير الشاعر ( بدر بن عبدالمحسن) وشكراً لكل من تواجد هنا أو تابعنا . وأنتظرونا بإستضافه جديده لشاعر أخر . وعميق الإمتنان لكم جميعاً .. سُعدت جداً بكم وبحضوركم الأنيق . تحياتي للجميع |
| الساعة الآن 05:30 AM |
Powered by vBulletin® Version 3.8.7
Copyright ©2000 - 2024, Jelsoft Enterprises Ltd
.:: تركيب وتطوير مؤسسة نظام العرب المحدودة ::.
new notificatio by 9adq_ala7sas
جميع الحقوق محفوظة لـشبكة ومنتديات همس الأطلال